بسم الله الرحمن الرحيم
في الحقيقة سأكتب بالعاميه رغم كوني لم أعتد على الكتابة
بها فتحملوا أي خطأ مني ...
بعد ماأنتهيت من المرحلة الثانوية دخلت مرحلة اخرى وهي التنسيق
ولي قصة روعة معاه
في الحقيقة سأكتب بالعاميه رغم كوني لم أعتد على الكتابة
بها فتحملوا أي خطأ مني ...
بعد ماأنتهيت من المرحلة الثانوية دخلت مرحلة اخرى وهي التنسيق
ولي قصة روعة معاه
في البدايه كتبت الرغبات وكانت ( صيدلة ، أسنان ، حاسبات ،
علوم ، ألسون ،تربية ،هندسة ،رياض أطفال )
وفي الحقيقة انا كنت اتمنى صيدلة في المرتبه الأولى وبعدين
حاسبات واسنان كتبتها بعد صيدلة ما عرفش ليه
بس ده الي جرى المهم لاني شهاده معادلة
تنسيقنا بيختلف عن التنسيق العادي فالتنسيق العادي ظهر بعد 10أيام
أما احنا لأننا شهادة
معادلة استنينا التنسيق تقريباً شهر ويمكن أكثر وكنت انا
وصحباتي على تواصل وكل شوية
نتصل ونسأل بعض في حاجة ظهرت عن التنسيق ونتصل
بالحكومة الألكترونية وكل يوم
نقرأ خبر جديد بكره هيظهر التنسيق ترقبوا التنسيق ...
وطبعاً كل مابنقرأ حاجة من دي بنبدأ
نقلق وأعصابنا تعبت من كثر الخوف وكان ده كلة من
قبل رمضان ب10أيام تقريباً لغاية
قبل العيد تقريباً ب 3 أيام كان تقريباً الساعة 8 بالليل وكلمتني واحدة
من صحابي وقالتلي :
سارة الحدود الدنيا ظهرت على موقع الجالية وكده شكلك هتدخلي
حاسبات اسيوط طبعاً انا
فكرة الدراسة هناك في مدينة أسيوط مرفوضة تماماً ( ليس لعيب فيها
ولكن لفكرة الأغتراب ) كلام صحبتي صدمني جداً
ودخلت موقع الجالية وقرأت
الحدود الدنيا وكانت التعليقات متناقضة ..شويه بيقولوا الحدود
ديه صح والباقي بيقول دي
حدود السنه الي فاتت أنا قرأت الحدود وقعدت أعيط ( أبكي )
وحسيت ان تعبي كله ضاع
ماما كانت عند تيتا ( جدتي ) وأنا كنت عايزة أتأكد من
مجموعي الأعتباري هو 386وكام
من مئة ... أول ما سألت ماما عن مجموعي طبعاً أستغربت وسألتني
هو التنسيق طلع ..وانا
طبعاً قعدت أعيط أول ماسمعت سيرة التنسيق وقلت لماما القصة ...
وقعدت ماما تصبرني
وان ده هو الخير مش أنت كنت بتدعي بالخير
( لأني طول ثالثة ثانوي وانا بقيم الليل
وبدعي أن ربنا يكرمني ويرزقني الخير )
وبعدين تعملي ايه بصيدلة والتعب ده كده أحسن
وأريح ليكي ... وكانت هاجر اختي وبنت خالتي قاعدين معايا
واخدوا يحاولوا يضحكوني
ويخرجوني من المود ده ... وعرفنا ان التنسيق هيبان الساعة
12طبعاً كل البيت عرف ولما
جت الساعة 12 تيتا طلعت تطمن ووقتها كانوا ( ماما ،هاجر أختي ,بنت خالتي
وبنت عمي )
قاعدين يضحكوني فتيتا تفكر التنسيق ظهر وقالت لي الحمد لله
انك مبسوطة ريحتيني دا أنا
كنت مرعوبة طبعا أنا قلت : تيتا التنسيق لسة ما ظهرش..
قعدت لغاية الفجر وانا فاتحة
الموقع وفي الأخر نمت ،بابا كان لسه مانزلش مصر صحيت
لقيت بابا جه لأنه كان عاملها
مفاجئة ... المهم قعدت مع بابا وماما واخواتي وفجأة موبايلي رن
رديت على صحبتي فقالت
لي : سارة التنسيق طلع عاملتي ايه .... أنا أتصدمت هو طلع امتى ..
وانت عاملتي ايه
( صاحبتي مجموعها كان أعلى مني ) قالت لي دخلت علوم قلت
لها مبروك وطبعا أنا قلت
يبقى انا كده الله أعلم انا دخلت ايه ( أنا ضعت )
فقالت لي : لا يا سارة أنت أكيد هندسة أو
حاسبات وقالت لي انها كانت كاتبه رغباتها غلط علشان
كده مادخلتش هندسة ( هي كتبت كل
كليات اسكندرية الأول رغم ان رغبتها الأولى كانت هندسة )
طبعاً انا فكرة هندسه كانت
مرفوضه عاندي لإني شايفه انها مش مناسبة للبنت
ولو دخلتها كنت هادخل هندسة
كمبيوترفيبقى حاسبات أحسن بالنسبة ليه...
وكانت نسبتي تدخلني هندسة ....
قفلت معاها وفتحت النت وانا تقريباً متأكدة
اني حاسبات ومعلومات أسيوط
وبجد لقيت جواب الترشيح لأسيوط ....
طبعاَ الكل بارك لي وجتلي هداية وحجات كده ...
وبعدين سافرنا وقدمت طلب تحويل لجامعتي الحالية
(وهرمز ليها بجامعة *) وبدأت أحضر
في الجامعة *وحضرت عدت محاضرات وقابلني موظف
في شؤون الطلبة طبعاً هو عارفني
لأن أخويه في نفس الكليه وقال لي أسمك مجاش
مع اسماء الطلبة المحولين انا أتصدمت
وماكنتش عارفه هعمل ايه والأيام الي ما حضرتهاش في جامعة أسيوط
... كلمت أخويهوماما وقلت لهم ....واتصلوا بيه بعد شويه
وقالوا ان الموظف غلط والأسماء الي جت دي
أسماء الطلاب الي أتقبلوا من الشهادات المعادلة
في الجامعة* وليس الطلاب المحولين ...
ومرت الأيام وكلمتني واحده من صحباتي كانت مقدمة طلب تحويل
وقالت ان التحويل
بتاعها أتقبل ( هي في جامعة تانيه )... أتصلت ماما بالموظف
في شوؤن الطلبة وسألته وقال لسه الجامعه عاندنا ماجلهاش حاجة
... وبعها بيومين بسأل قالو لي
الملف جه لكن في غلط في الملف (تخيلوا نفسكوا مكاني )
ده من بره عليه أسمك والورق
الي جواه ورق بنت تاني ... وماتقلقيش كده انت اتحولتي ...
وبعدها بأسبوع جه الملف وقالوا لي ده ناقص
ورقة المجموع الأعتباري وماتقلقيش احنا هانبعت
نجيبها ...
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
أنا حبيت أكتب أول حاجة التنسيق و بدايه دخولي الكليه
وباعدين بأذن الله هأتكلم معاكوا عن
المشاكل الي هتقابلني علشان نتناقش فيها وأجمع أرائكم علشان
نكون صورة واضحه من
خلال وجهات نظرنا المختلفة ...
14 التعليقات "Comments":
الف الف الف مبروك ياسوسو كلية حاسبات كلية جميلة ربنا يوفقك_
الله يبارك فيك
الله يبارك فيك
حبيبتى سارة الله يكون فى عونك تجربه تنسيقك بكل الكوميديا اللي فيها الا انهااكيد سببت ضغط نفسي جامد عليكى بالرغم ان انا كمان كنت شهادة معادله بس فى فرق كبير بيننا انا مكنتش بتابع النتيجه بنفسى ولا حتى قدمت فى مكتب التنسيق والطريف ان ترتيب الرغبات تقريبا كان حسب اهواء خطيبي وانا مكنش شاغلنى التفكير فى الكليه اللى هروحها الا انى كنت بحب مجال الطفوله بشكل كبير جدا وطبعا بابا شجع الفكرة لان طفولة مش هيكون فيها اختلاط وفعلا قدم التنسيق وكتب طفوله رغبه اولى بالرغم ان مجموعى كان قابل السن وبعدها تربية عام انجليزى وتقريبا كانت طفوله اقل كليه وقتها فى الحقيقة ماما كانت زعلانه وانا بجد مكنش فارق معايا لان الكليه اللي انا كنت بحلم بيها طول فترة الدراسة فى الثانوى كانت وهم ومش موجودة وهى كليه احتياجات خاصة وعرفت بعدين انها مجرد تدريب مش كليه منفصله فقبلت اي حاجه علي انى ناويه ان شاء الله اكمل حياتى العمليه فى مجال الاحتياجات الخاصة والطريف انى كنت بروح الكليه قبل ما ورقى يوصل وكنت بحضر المحاضرات قبل ما اعرف انا رحت فين وتقريبا بعد اسبوع بابا كلمنى وقاللي مبروك اسمك نزل فى الجريدة وقبلتى طفوله وانا دلوقتى سعيدة جدا بوجودى فى مجال مناسب مع طبيعه البنت واللى هيساعدها بعدين تكون ام تقريبا عارفة كل حاجه عن طفلها وازاى تتعامل معاه انا بجد بحمد ربنا على اللى انا فيه لان الانسان مش بيعرف الخير فين بس ربنا بيساعده على كدة ودى هى قناعاتى فى كل مواقف حياتى
حفصة حبيبتي .. شكراً بجد على مرورك وشكراً أكثر على قصتك مع التنسيق لانك تعتبري من القلة الي بيحكوا المواقف الي جرت معاهم ودي حاجة بتسعدني بجد لان لما انا بكتب موضوع معين وكل شخص بيعلق هيكتب المواقف والأفكار المرتبطة بالموضوع ده هيساعدنا بجد في تكوين أفكار متكاملة وصور واضحة وبكده هنحقق الهدف من المدونة (لنناقش ....)
وهستنا مرورك دائماً
كان يازمان في الجامعة
نفس ما حدث عندما تقدمت بأوراقي إلى مكتب التنسيق .
كتبت آداب عين شمس أولا ثم آداب القاهرة، ثم عدلت الرغبة الأولى في آخر لحظة ، ولصقت طابع دار العلوم جامعة القاهرة على الطابع الأول (آداب القاهرة)، ثم حدث نفس ما حدث معك النتيجة آخر التنسيق ، وجاءت دار العلوم القاهرة .
وأخيرا المهم ليس في سنوات الجامعة ، وإنما في اكتساب المهارات ، وتكوين الصداقات الناجحة ، وقضاء أوقات مفيدة.
الجامعة وقت الاستفادة من تجارب الآخرين ، وأولا الاطلاع عليها ، وانتقاء الأفضل منها.
إنه وقت بناء الشخصية ، أو بناء القدرات من حيث الوعيي بالنفس والمحيط.
وأخيرا أتنمى لك أفضل مستقبل ، وأفضل ما تجيدي وتحبي وتختاري.
إيهاب عبد العزيز
اعجبني هذا الموضوع ونحن في انتظاره مره اخره مع لنناقش الحياه
اعجبني هذا الموضوع ونحن في انتظاره مره اخره مع لنناقش الحياه
شكراً بجد على مرور حضرتك (أ. ايهاب )وانا معك فيما قلت عن أهمية المرحلة الجامعية ... وأتمنى منك الأستمرار في متابعة المدونة
شكراً لكم جميعاً على هذه التعليقات
كلامك بدائى جدا يابشمهندسه واسلوبك عيااااااااااااااالى جدا ده انتى لو شفتينى وانا بكتب تكرهى اللى انتى كاتباه .
واحد من الدفعه غلباااااااان
بسم الله الرحمن الرحيم
ماجمل تلك المواضيع!وما اروعها.
سارة بجد اسلوبك كويس فى الكتابة وكمان طريقة الحوار.اتمنالك الافضل فى دراستك وحياتك لكن اسمحيلى ارد على البشمهندس الى من الدفعة الى كتب التعليق الى عدا واقوله:حضرتك من حقق تعلق على الكلام الموجود وتقول رايك لكن مش بالطريقة الى حضرتك بتتكلم بيها وان حضرتك تدى نفسك الحق انك تهجى الناس فى اسلوب كتابتهم باسلوب غير لائق.ثم احنا ميهمناش نعرف حضرتك بتكتب باى اسلوب لان دا شىء مايهمناش نعرفه وهى اسلوبها مش عيالى زى ما حضرتك بتقول الى بيقول الكلام دا اكيد هو الى اسلويه عيالى.
سارة ماتسمعيش لاى كلام بالطريقة دى وتخلى الكلام دا يأثر فيكى انا عارفة انك بتقبلى نقد اى حد لكن ركزى على موضوعاتك وامتعينا دايما بموضوعات جميلة اكنر واكتر بجددددددددد انا بحبك اووووووووووووووووووووووووى واتمناك كل التوفيق من كل قلبى اظن انك عارفانى فامفيش داعى لذكر اسمى
السلام عليكم
اسلوبك رائع يا بشمهندسه ومش هشكر فيه كتير لانه مش محتاج
اسمحيلى ارد على الاخ اللى بيقول انه من الدفعه
اولا كون انك من الدفعه ده شئ مشكوك فيه لان مفيش طالب جامعى يكتب تعليق بالاسلوب ده
ثانيا انت ايه الى مضايق سيادتك ومخليك تتكلم بحرقه وغل كده
ثالثاانا اعرف ان اللى يتكلم وينقد حد يبقى قد كلامه ويقول اسمه علشان نعرف نرد عليه بقدر حجمه(قال واحد من الدفعه غلبان)
إرسال تعليق